بقلم الكاتب المصري : خالد حبيب
عندي قناعة رهيبة انه فيه قوة سحرية في الكرسي . اي حد بيكون شخصية مختلفة تماما اول ما بياخد اي منصب و بيقعد على الكرسي . بيتغيّر . أفكاره و آراؤه و سلوكه.
الّي هي في الاخر قناعاته و مبادئه . و الّي حواليه كمان بيساعدوا في التغيير. بيعاملوه كأنه أسطورة و اله . و يخلّوه يحس انه دايما بطل و دايما مظلوم و دايما بيضحي و دايما صح و دايما كل حاجة . و غالبا الّي حواليه في الوقت ده مش بيكونوا حبايب او اصحاب . بيكونوا حبايب نفوذ و اصحاب مصالح . بيبعدوه عن الناس الّي تستاهل و هو يستاهل يكونوا جنبه . و تدريجيا بيبطّل يسمع للأصحاب بجد . و ينساهم و ينسوه . لغاية ما يسيب الكرسي . بيرجع للحياة الحقيقية . لكن عمره ما بيرجع لنفسه . و عمر أصحابه و أحبابه ما بيرجعوله . شفتها و باشوفها كتير . الكرسي يا جماعة . مش نعمة . نقمة .
