نشرت الطبيبة بمستشفى الطاهر صفر بالمهدية " دينا محمود " على صفحتها الرسمية على الفيسبوك هذه التدوينة :
عسلامة ♥️
اليوم بش نحكي الي صار علينا كطبيبة داخلية و اطار شبه طبي في سرفيس كوفيد نهارين ملي حل 🤷
الوم دخلت شفت ناس في اعمار صغيرة و مغير مرض سابق يعانو باتم معنى الكلمة و قلبي وجعني و خممت كان في روحي كان نولي كيفهم لكن في لحظة تشتت تخمامي السلبي بصوت دكتور فقيه (اكثر طبيب انساني في الدنيا ) "هيا دينا بنتي ادخل للمرضتك "
و ساعة بعدها ؛ يعلموني الي الاكسجين ينجم يقص
طلعت نجري و في مخي بابا و امي و جدتي الكبيرة و خويا صدقي و خالي امين الي يتكيف و اي حد نحبه في الدنيا 😭😭😭😭
الكلهم ينجمو يكون في بلاصة هاك المرضى 😭😭😭
الحمد الله لبست و دخلت و الاكسجين مازال اما قلبي خايف و مجاش لمخي نكلم الطبيبة المقيمة الي معيا و الا د كتور فقيه 😥
و في ثواني اصوات الاكسجين نقصت و اقارب المرضى يبكو من وراء الشباك و انا نعلم الفراملة( الي مقصرو معى حتى مريض ♥️♥️) و الكلنا خفنا و هدينا المرضى الي بدو يتعكرو و انا وليت انقص الاكسجين عل المرضى االي شادين رواحهم شوية بش يوصل شوية اكسجين للاخرين 😓😓😓😓
و الحمد الله الكابوس المرعب دام اقل من 14 دقيقة تعدو اصعب لحظات في حياتي كنت فيهم نرضي في المريض و نطمن في عايلتو الي كنت نخرجلهم بلبسة الكوفيد (من بعيد خاطر المرضى تعبو برشا) نلوج معاهم على حلول نعدو باها النهار 🤦🤦😥😥😥
و رجع الكسجين الحمد الله ♥️♥️♥️♥️♥️
الكلام هذا بش يقراه كل حد يعمل عرسو و يضر غيره و كل حد يفكر يعمل لمة كبيرة و يكون سبب في موت غيره
نفاذ الاكسجين موش مسؤلية حتى حد !!!! مدام فما ناس مزالت تخمم الي الكوفيد لعبة و كذبة !!!!!
عن طبيبة داخلية
#شد دارك
# البس بافتك
