#خليها_تعنس .. حملة لمقاطعة الزواج بتونس بسبب ارتفاع التكاليف

#خليها_تعنس

في مصر هالأيّامات عاملين حملة بإسم #خليها_تعنس ، و هي دعوة أو صرخة من الشباب المصري ، الذكور منهم ، على إرتفاع تكاليف الزواج و سيرتو الشروط المجحفة متاع الأهل باش يعطيو بنتهم او بالأحرى يتخلاو عليها .. 

بون ، ظاهرلي نفس المشكل مطروح في المجتمع التونسي ، و شبابنا السمح يعانيو من نفس المشكل ( و ماناش باش ندخلو طبعا في التحليل الجندري للموضوع و بُعدو الميزوجيني الضيق) ، لكن بيناتنا .. العزوف عن الزواج الكلنا نعرفو إنو سببه الرئيسي هو الفلوس و تكاليف العرس و نوعا ما "الدراش" ( الدلال بلهجة جنوبية ) سيرتو متاع العروسة و أهلها ، إستغلالا للظروف تارة و عن حسن نية تارة أخرى ، خلّينا نكونو واضحين ، .. إبتداءا من : فرحة العمر و الطفلة الوحيدة و أول عرس و ڤريدة العش و دلولة بوها و معزة خالها ... إلى باقي التبريرات المجتمعية متاع تكسير كرايم العروس في المصروف و في تثقيل ال Budget من مصروف حفلة و هدايا و دار و فازات .. و في لخر 6 أشهر ماكسيموم و يبدى العرك و تبدى المشطة و القضايا .. 

و أكيد عدم جديّة الشاب من جهة أخرى عندو دور في الحكاية ، ما ننكروش هذا : يحب يعرّس و هو بطّال ، يحب يلمّ ساقيه و هو موش قادر يضمن لبنت الناس المينيموم متاع العيشة ، طبعا هذا اذا كانت هي من النوع الي أعطيها تهنّي على روحها برك.. يعني المسؤولية مشتركة نوعا ما ، لكن دور الصبيّة في حطّان العصا في العجلة دور كبير و سيرتو دور عايلتها الطاغي و المتحكّم في أغلب الأحيان ..

لذا يهديكم.. عِفّو شويّة على صغاركم وخلّي الشباب يتكاثر و يشوف حياتو راهي الدنيا صعبت يعنطلاو عليكم 😀 بقلم علاء الزيادي